廣深港高鐵老早已經一搥定音，奉阿爺之名落實執行。咁起鐵路呢家野，無返三五百億當然無可能成事啦~!2008年，政府就話起呢條全長26公里o既香港段，造價要395億(講開又講，大陸o個面長104.6公里都只係需要$190億...究竟係物價真係低成10幾倍定係偷工減料減10幾倍呢~!?)。大拿拿成400億，每個香港人即係要拎$5700出o o黎起一條你一年都未必會坐一次o既鐵路...無野呀??

      OKOK，395億都算喇...豪俾你囉，我地香港人大方得體，最緊要和諧咖嘛。好似迪迪尼咁貼錢嫁女，彷如當年八國聯軍入侵，割地賠款一樣，我地都無出聲咖。但尋日運輸及房屋局局長鄭汝樺就話Sorry, 計錯數，埋單可能要$630億....都仲未必夠。嘩~無啦啦要俾多$235億...? 燒俾你呀? 定係我去左津巴布韋呀??乜通漲咁快o既??

      咁鄭汝樺當然即刻解釋話唔係唔係，呢條鐵路，唔係起俾你地用o既，你地索K叫雞o個D坐皇崗巴咪得囉。呢條路，係起俾o個D達官貴人做生意用o既。晌未來50年就會為香港帶o黎$830億o既經濟效益...未計通漲o既。50年，用$630億換取估計o既$830億...咁好明顯唔應該進行呢個計劃啦下話?? 假設你搵個投資顧問，佢話有個好荀o既計劃，50年穩賺3成，未計通漲。嘩~要50年先賺3成仲未計通漲~!? 賺左o個3成會唔會追唔到通漲咖? 你當我白痴咖??

     其實鄭汝樺當然唔會當香港人係白痴啦~!但唔係當人白痴，又講得出咁白痴o既說話，可能性只得兩個：

一. 阿爺落Order，有乜計呀?莫講話要用$630億換$830，就算要你用$830億換$630億你都要照做咖啦。知其不可為而為知，同當年葉劉推廿三條...又真係有D異曲同工之妙...(仲要兩個人o既髮型都有D似添喎衰鬼...)

二. 佢唔當人係白痴，但佢自己就係一個白痴。當然佢唔係智力有問題o既白痴，係經濟知識有問題o既白痴~!首先，2008年4月o既預算竟然同2009年5月o既預算有50%出入，咁你究竟有冇算過??定只係斷估??定係你能力上有問題導致預算有咁大出入?? 會唔會過一年後又要多50%咖~!?其實我地真係好鬼concern呢D問題咖。香港人對數字好敏感咖嘛。2012同2017只係差5我地都嘈左10年，家陣630同830差200喎....點都要嘈返半個世紀啦~!其次，投資$630億賺3成要50年...咁點解唔用$630億買起皇馬+巴塞+車路士+曼聯呢? 4隊波加埋市值都係$500億，但係上年4隊加埋已經賺左$123億....5年已經賺夠3成啦....仲要50年??

      不過，咁其實係無辦法咖。我地一直都話香港只有經濟o既政府，並無政治o既政府。政治，我地政府無話事權，所以有事時D高官執行Mission in Possible, Promote一D無可能得到香港人認同o既Proposal, 我係會諒解，亦都覺得佢地好敬業樂業(大佬，個老母要24小時On Call但都仲唔quit份工，晌立法會開會要笑笑口俾人鬧，你估人人做得到咖~!?)。而佢地晌經濟呢方面o既決策都唔係太好，大家亦都係應該體諒咖。因為，原來我地o既特首、三位司長同埋鄭局長，佢地晌大學都唔係主修經濟咖~!所以佢地梗係唔知咩先係真真正正o既經濟效益啦...

雞蛋